Deveci Broyler

Zakir Əzimov: “İSO 22000 standartının “Dəvəçi Broyler”də tətbiqi bizə məhsulumuzu beynəlxalq bazara çıxarmağa imkan verəcək”

     Qış aylarının yaxınlaşması ilə əlaqədar ölkədə quş əti bazarına və ümumiyyətlə, quş əti məhsullarının təhlükəsizliyinə və keyfiyyətinə olan diqqət artmaqdadır. Bununla əlaqədar, oxuculara ölkənin aparıcı broyler fabriklərindən olan və uzun illərdir istehlakçıların bu sahədə güvənini qazanmış “Dəvəçi Broyler” Açıq Səhmdar Cəmiyyətinin Baş Direktoru Zakir Əzimovun bazardakı son vəziyyət və şirkətdə aparılan yeniliklər barədə müsahibəsini çatdırırıq:

     İlk öncə xahiş edirik, “Dəvəçi Broyler” ASC-nin istehsal etdiyi “Səba” toyuqların satış səviyyəsi barədə məlumat verəsiniz. Ümumiyətlə, hazırda bazarda bu sahədə vəziyyət necədir?
     -İlk olaraq onu qeyd edim ki, “Dəvəçi Broyler” Açıq Səhmdar Cəmiyyəti tərəfindən bu il 8200 ton quş əti satılması nəzərdə tutlumuşdur. Bu ilin on bir ayı artıq arxada qalıb və bu, planın yerinə yetirilməsi real görünür. “Dəvəçi Broyler”ASC-nin istehsal etdiyi “Səba” toyuqları alıcılar tərəfindən kifayət qədər yüksək qiymətləndirilir və məhz keyfiyyətinə görə alıcılar həmişə bu məhsulla üstünlük veriblər. Yəqin elə ona görədir ki, bu günə qədər “Dəvəçi Broyler”ASC satışla bağlı elə bir ciddi problemlə rastlaşmayıb. Ancaq ümumiyyətlə götürsək son günlər bazarda quş ətinə tələbat azalıb və bunu bizdə hiss eləməyə başlamışıq. Bunu da başlıca olaraq idxal olunan quş ətinin son vaxtlar nisbətən çoxalması ilə əlaqələndirirəm. Bununla belə biz davamlı olaraq istehsal etdiyimiz məhsulun keyfiyyətinə diqqət yetiririk və çalışırıq ki, brendimizə xələl gətirəcək heç bir hala yol verməyək. Bu yolda lazım gəldikdə əlavə sərmayə də qoyuruq, əlavə işçi qüvvəsi cəlb edirik, yeni texnologiyalar tətbiq edirik, bir sözlə, bütün diqqətimizi ilk növbədə istehsal etdiyimiz quş ətinin keyfiyyətinə yönəldirik. Bu da təbii ki, satış prosesində özünü doğruldur.
     Bildiyimiz kimi, “Dəvəçi Broyler”ASC quşçuluq sahəsində Azərbaycanda İSO 22000 və İSO 9001:2000 beynəlxalq standartlarının tətbiq olunduğu çox az şirkətlərdəndir. Bəs bu standartların tətbiq olunması prosesi hazırda necə gedir?
     - “Dəvəçi Broyler” 2006-cı ildə İSO 9001:2000 beynəlxalq standartına uyğunluq sertifikatını alıb. Almaniyanın Tüv-Türingen orqanı tərəfindən verilən bir sertifikat idarəetmənin təkmilləşdirilməsi, keyfiyyət menecmentinin yaxşılaşdırılması kimi faktorlara əsasən bizə təqdim olundu. Lakin biz bununla kifayətlənmədik və indi müəssisəmiz İSO 22000 beynəlxalq standartının tətbiqinə başlayıb və bu standartın da başlıca tələbləri qida təhlükəsizliyinin təmin edilməsinə yönəldilib. Bu tələblərin yerinə yetirilməsi isə öz növbəsində maksimum şəkildə imkan verir ki, istehsal olunan məhsulda insan orqanizmi üçün zərərli olan heç bir məqam qalmasın. Yəni insanın səhhətinə mənfi təsir göstərə biləcək nə varsa, istehsal prosesində bunların hamısı nəzarətə götürülür və bu hallar aradan qaldırılır. Bu, xammalın alınmasından, istifadə olunan bütün inqridientlərin və yemlərin keyfiyyətindən, müəssisədəki iş şəraitindən tutmuş məhsulun istehsal olunub alıcıya çatdıırlmasına qədər bütün prosesi əhatə edir. Burada söhbət həm kimyəvi, həm bioloji və həm də fiziki təsirlərdən gedir. Bir sözlə qida təhlükəsizliyini təmin edən bu cür tədbirlərin həyata keçirilməsi satışa göndərdiyimiz quş ətinə alıcıların inamını artırır və onlar bu məhsulu arxayın bir şəkildə alıb yeyirlər.Biz bu uyğunluq sertifikatını gələn il almağı nəzərdə tutmuşuq. Hazırda isə müəssisədə bu standartın tətbiq olunma prosesi gedir – mütamadi olaraq müvafiq orqanlar tərəfindən işin gedişatı yoxlanılır, audit aparılır və bu iş sertifikat alana qədər davam edəcək. Sertifikat alındıqdan sonra da tələblərə nə qədər doğru riayət olunduğunu yoxlamaq üçün müvafiq nümayəndələr buradakı istehsal prosesini nəzarətdə saxlayacaqlar.
     Onu da qeyd edim ki, sözügedən – İSO 22000 Beynəlxalq standartı bu gün bütün dünya şirkətlərində böyük önəm verilən bir sertifikatdır. Bunun dünya üzrə tanınan və kifayət qədər ciddi qəbul edilən bir sertifikat olduğunu nəzərə alsaq, bu standartın “Dəvəçi Broyler”ASC-də də tətbiqi bizə məhsulumuzu gələcəkdə xarici bazarlara da çıxarmağa imkan verəcəkdir.
     Yeni çeşidlərlə bağlı nə deyə bilərsiniz?
     - Bu istiqamətdə də müəyyən işlər görürük. Əsasən də quş ətinin dərin emalına xüsusi diqqət yetiririk Düşünürük ki, biz bu sahədə yenilik edəcəyik və o zaman çeşidərmizin sayı da qat-qat artacaq. Gələcək planlarımızda isə ən azı 100 çeşiddə məhsul istehsal etmək var. Və şübhəsiz ki, yeni çeşidlərdə də bizim ilk məqsədimiz keyfiyyətin ən yüksək səviyyədə olmasını təmin etmək olacaq.
     Bildiyimizə görə, hazırda yeni yem zavodununda tikintisinə başlamaq istayirsiniz. Bu barədə nə deyə bilərsiniz?
     - Biz müəssisəmizi daha da genişləndirməyi düşünürük. Hal-hazırda bizim yem zavodumuzun gücü saatda 10 tondur, ancaq qarşıda quş əti istehsalının artırılmasını nəzərə alaraq biz istehsal gücü saatda 25 ton olan yeni yem zavodunun tikintisini nəzərdə tuturuq. Eyni zamanda yem üçün xammalların saxlanması üçün 30 min tonluq anbarların tikilməsi üçün hazırlıq işləri aparılır.
     Bu istiqamətdə qarşımızda duran əsas vəzifə isə dünya standartlarına cavab verəcək yeni yem istehsalı zavodunun inşasıdır.
      Son zamanlar broyler fabriklərinin bəzilərinin fəaliyyətini dayandırması və yeni fabriklərin fəaliyyətə başlamasını necə qiymətləndirirsiniz? Ümumiyyətlə, hazırda bazarda rəqabətin səviyyəsi necədir?
     - Ümumiyyətlə, Azərbaycanda hər zaman quş əti çatışmazlığı olub. Çünki ölkə yerli istehsalla təqribən istehlakçıların 50-60% tələbatını ödəyə bilir. Məhsulun digər hissəsi isə xaricdən idxal olunur. Ona görə də Azərbaycanda yeni fabriklərin açılması arzuolunan bir prosesdir. Çünki bu sahənin inkişaf etməsi üçün Azərbaycan bazarında kifayət qədər imkan var və bunun üçün yerli istehsala önəm verməliyik. Bildiyiniz kimi dövlət tərəfindən Ərzaq Təhlükəsizliyi Proqramı qəbul olunub. Müddəti 2015-ci ilədək olan bu proqramda digər məhsullarla bərabər quş əti istehsalının inkişafına da böyük önəm verilib. Bu proqrama əsasən 2015-ci ilədək sənaye üsulu ilə - yəni quşçuluq fabruklərində istehsal edilən quş ətinin miqdarı 80000 tona çatdırılmalıdır. Hesab edirəm ki, respublikanın imkanlarımızı nəzərə alsaq, bu, çox real bir proqramdır və məhz bu proqramın tələblərinin yerinə yetirilməsi çərçivəsində Azərbaycanda yeni quşçuluq fabriklərinin tikintisi və inkişafı mümkündür.
     Bəs rəqabətə gəlincə?
     - Rəqabət məsələsinə gəlincə bazarda rəqabətin olması çox vacibdir. Bu, mütləq olmalıdır. Çünki rəqabət keyfiyyət, istehsalın düzgün planlaşdırılması kimi bir çox məqamlarda hər bir müəssisənin işinə müsbət təsir edir. Buna görə də bazara hər hansı bir məhsulu çıxardıqda onun üçün çox böyük əmək sərf olunmalıdır. İstehsal və satış prosesində hər bir məqama diqqət yetirilməlidir ki, bazara çıxarılan məhsul rəqabətə davamlı olsun. Bu gün biz “Dəvəçi Broyler” olaraq respublika daxilindəki rəqabəti düşünürük, amma gələcəkdə qarşımızda duran əsas vəzifələrdən biri məhz məhsullarımızın beynəlxalq bazara çıxarılmasıdır.
     Sonda istərdik, müəssisədəki işçi qüvəsi və iş şəraiti barədə məlumat verərdiniz.
     Bütün söylənənlərlə bərabər yeni iş yerlərinin açılmasına da diqqət yetiririk. Hazırda əməkdaşlarımızın sayı 700 nəfərə çatır. Növbəti iki ildə isə onların sayının 1000-ə çatdırılması nəzərdə tutulub. Bu isə öz növbəsində iqtisadi cəhətdən o qədər də güclü olmayan Dəvəçi rayonu üçün əlamətdar bir hadisədir və buradakı insanların rifahının yaxşılaşdırılması baxımından olduqca vacibdir.
     Eyni zamanda işçilərin əmək haqlarının stimullaşdırılması da hər zaman diqqətimizdədir. Müəssisədə çalışanların əmək haqları mütamadi olaraq artırılır. Şübhəsiz, müəssisənin işinin rentabelli qurulması və istehsalatın düzgün aparlması birbaşa olaraq burada çalışan insanların rifahının yaxşılaşmasına öz müsbət təsrini göstərir.