Deveci Broyler

İSO 9001:2000 Keyfiyyət menecmenti sistemi fəaliyyət sahəsi və həcmindən asılı olmayaraq bütün növ şirkət və müəssisələrdə tətbiq edilə bilən beynəlxalq standartdır. Bu və ya digər şirkət və ya müəssisə bu standartın tətbiq etdiyini bəyan etdiyi andan bu standartın bütün müddəalarının tətbiq edilməsi və bu müddəaların tələblərinin müəssisədə icra edilməsi məcburi hesab edilir. Lakin İSO 9001:2000 standartının 1.2 bəndinə əsasən müəssisə öz xüsusiyyətlərindən asılı olaraq yalnız standartın 7-ci bəndindən bəzi tələbləri yerinə yetirməyə bilər. Bu mənada 1.2 bəndini rəhbər tutaraq “Dəvəçi Broyler” ASC müəssisənin xüsusiyyətlərini nəzərə alaraq İSO 9001:2000 standartının aşağıdakı bəndlərinin tələblərini tətbiq etməmişdir: 1) 7.3 (Layihələşdirmə); 2) 7.5.2 (Xidmətin göstərilməsi proseslərinin təsdiqi); 3) 7.5.4 (İstehlakçının əmlakı). “Dəvəçi Broyler” ASC-də istehsal edilən məhsulun layihələşdirilməsi aparılmadığına görə (bu adətən mebel istehsalında və s. olur), məhsulun, xidmətin göstərilməsi proseslərinin təsdiqinə ehtiyyac olmadığına görə (bu qaynaq, körpü tikmə, bank sektorunda, təhsil vermə və s. sahələrdə tələb olunur) və məhsulun istehsalında istehlakçının (müştərinin) mülkiyyətindən istifadə edilmədiyindən bu bəndlərin tələbləri istisna edilmişdir. Digər bütün bəndlərin tələbləri tam mənada yerinə yetirilir və bu öhdəliyi “Dəvəçi Broyler” ASC üzərinə götürür. Sualınızın ikinci hissəsinə gəldikdə “Dəvəçi Broyler” ASC-də əsas dəyər gətirən fəaliyyət sahələri proses yönümlü idarəetmə nəzarətinə götürülmüşdür. Bu proseslərdə statistik nəzarət metodları tətbiq edilmişdir və proseslərin göstəriciləri daim təhlil edilir. Əlbətdə ki, bu formada nəzarət forması yüksək keyfiyyətin qarantıdır, çünki statistik üsullar problemi baş verməzdən əvvəl proqnozlaşdırmağa imkan verir. Sualınıza görə təşəkkür edirəm!
Müəllif: Keyfiyyət menecmenti şöbəsinin müdiri
Rüfət Məmmədzadə